Opisyalen a naglukat ti Benguet Provincial Athletic Meet ita nga aldaw nu sadino, naangay ti parada manipod Puguis,La Trinidad paturong iti Benguet Sports Complex idiay Wangal, La Trinidad.
Iti panakiuman ti Bombo Radyo kenni Caesar Luma-ang, Provincial Sports Officer iti Department of Education-Benguet, simmangbay idiay La Trinidad ti delegasyon dagiti nagduduma a munsipyo idi kalman nu sadino, daduma kadagiti atleta ket naggapo pay iti kalleppas a 2024 Batang Pinoy.
Sigun kenkuana, dumanon iti mapatta-patta a 5000 agingga 6500 dagiti partisipante iti nasao a provincial meet.
Imbinglay ni Luma-ang a nagduduma ti pakaangayan dagiti ay-ayam kas iti oval iti Benguet Sports Complex a maaramat para iti athletic events, iti CCDC, King’s College of the Philippines, Benguet State University, Capitol Covered Court, ken daduma pay a partner private schools para kadagiti ball games.
Mainaig iti dayta, maangay met ti swimming competition iti Baguio Baguio City nga immunan a naikoordinar iti maseknan nga sports officer.
Maangay daytoy ita nga aldaw agingga inton bigat.
Iti sabali a bangir, addan dagiti nadutukan nga opisyal para iti medikal a serbisyo nga agbantay kabayatan ti nasao a pasalip.
Sigun kenni Luma-ang, nakikoordinarda iti Phlippine Red Coss, ken iti Benguet General Hospital.//Bombo Rob Dominguez
