BAGUIO CITY – Impalagip manen ti Tabuk City Police Station ti saan a panagaramat ti homemade electrocution device nu agkalap ti lames.
Kasaruno daytoy ti ipupusay ti maysa a mannalon kalpasan a nakuryente iti talon sadiay Barangay Dilag, Tabuk City idi kalman.
Immunan a nabigbig ti biktima a ni Rigor Totizano, residente ti Barangay Ipil.
Iti imbestigasyon ti Tabuk City Police, nakaawatda ti impormasyon nga adda ti nasarakan a bangkay iti rice paddy ken nakalublob pay ti ulona iti danum.
Iggemna ti maysa a homemade fishing device a maatap nga inamaratna iti panagkalapna ti lames.
Naduktalan a pimmanaw ti biktima idi alas nuebe ti rabii idi Enero 20, tapno agkalap iti irrigation ngem saan metten a nagawid.
Sigun pay iti Tabuk City Police Station, daytoy ti kaunaan nga insidente ti pannakakuryente gapu iti panagaramat ti fishing device.
Gapu iti daytoy, ad-adda pay nga ingetan ti pulisya ken dagiti barangay officials ti panagbantayda tapno saanen a maulit ti nasao nga insidente.
