Agbalbalin latta a karit iti siudad ti Baguio ti saan a panagtungpal ti publiko iti panangisegregate wenno panangilasin kadagiti basura dagitoy kas ti nabubulok ken saan a nabubulok.
Gapu iti daytoy, kiddawda iti umili wenno iti publiko a makitinnulong dagitoy kadakuada babaen iti panangilasin kadagiti basurada tapno ad-adda a nadardaras ti panag-akup dagitoy.
Malaksid iti dayta, inlawlawagda metlaeng ti rason no apay a maysa metlaeng a parikut ti saan a nasapa a pannakakolektar ti basura wenno ti pannakasinga dagitoy.
Daytoy ket gapu iti kinaadu ti basura, ti saan a panagsegregate ken dadduma pay.
Nupay kasta, impasigurado ti General Services Office nga aramidenda ti kabaelan dagitoy.
Kabayatanna, inyunay-unayda pay a saan nga iruar dagiti basura iti kanito nga agtutudo tapno saan a mabasa dagiti basura a mangitunda iti nadagdagsen a kilo daytoy.
