Impeksa ni Senate President Francis “Chiz” Escudero a kababain iti benneg ti Philippine National Police ken kadagiti law enforcement agencies ti saan paylaeng a pannakatiliw ni suspended Bamban, Tarlac Mayor Alice Guo agingga iti agdama.
Maipalagip a nangipaulog ti Senado iti arrest order kontra kenni Guo ken kadagiti kabagyanna dua a lawasen ti napalabas ngem agingga ita ket awan paylaeng ti natiltiliw kadakuada.
Ni laeng Nancy Gamo, accountant ni Guo ken dagiti otorisado a representatives ti Philippine Offshore Gaming Operator firms idiay Bamban, Tarlac ken Porac Pampanga, Dennis Cunanan ti dimmar-ay iti imbestigasyon iti Senado.
Immuna metten a kinuna ni Senate President Pro Tempore Jinggoy Estrada a maksayan ti pundo ti National Bureau of Investigation ken ti Philippine National Police nu saanda a matiliw ni Guo ita a bulan.
Impetteng ni Estrada a naipaayan iti pundo ti NBI ken PNP tapno agiserbi kadagiti arrest orders pakairamanan ni Guo.
Iti baet met ti panangbabbalaw ni Escudero kadagiti law enforcement agencies, impeksana a saan a nasken a maksayan ti pundo dagitoy.
