BAGUIO CITY- Agtaltalinaed a karit iti rehabilitasyon ti Balili River iti saan a panagtungpal dagiti residente ti syudad iti umno a panagibelleng iti basura.
Sigun kenni Mayor Benjamin Magalong, adda dagiti residente a makapungtot tunggal masitar dagitoy iti panangibellengda ti basurada iti nasao a waig a mangituntunda iti sakit ti ulo kadagiti barangay officials ken kameng ti City Environment and Parks Management Office (CEPMO) a mangipatpatungpal iti regulasyon iti panagbelleng ti basura.
Nupay kasta, kinunana nga agtultuloy latta dagiti programada tapnu madisiplina dagiti residente sadiay.
Inlawlawagna a paset daytoy ti adbokasiya ti lokal a gobierno para iti rehabilitasyon ti Balili River ken nasken a maimula ti kapanunutan dagiti umili ti kinapateg ti disiplina ken panagbalin a responsable iti panagbasura.
Innayunna a nasken a masustinir ti programa a mangipaay iti edukasyon wenno awareness tapnu mamintinir ti nangato a sense of responsibility dagiti umili.
Dinakamat ti mayor a dumanon iti nasurok 33,000 a cubic meters ti waste water discharge ti syudad nu sadinno manipod iti nasao a bilang, nasurok laeng iti 5.4% dagiti madaldalusan bayat a ti nabatbati a 90% ket agdirderetso kadagiti waig.
Rumrumwar pay iti pannagadal ti Environmental Management Bureau – Cordillera Administrative Region a kangrunaan paylang a pagtataudan ti polusyon iti Balili River ket ti direkta a panangibelleng kadagiti basura ken waste water dagiti pagtaengen ken estbalishemento a masarakan iti igid ti waig
