Nasaripatpatan ti sangapulo ket pito a Chinese warships iti West Philippine Sea sigun iti Philippine Navy.
Maibasar iti datos ti nasao nga ahensia, dumanon iti sangagasot pito pulo ket walo ti bilang dagiti barko ti China iti taaw a masakupan ti pagilian a Pilipinas.
Karaman ditoy dagiti sangapulo ket pito manipud iti People’s Liberation Army Navy, dua a Chinese research survey vessels idiay Bajo de Masinloc wenno Scarborough Shoal, manipud idi Sitiembre baente kwatro anginga a trenta iti agdama a tawen.
Malaksid iti dayta, dumanon iti dua pulo ket walo a China Coast Guard ken sangagasut tallo pulo ket maysa a Chinese maritime militia vessels ti agtaltalinaed iti West Philippine Sea.
Maipalagip nga inwaragwag ti China a nangorganisar dagitoy iti naval ken air forces tapno mangisayangkatda kadagiti routine reconnaissance, early warning ken sea-air patrol exercises iti aglawlaw ti Bajo de Masinloc a sakopan ti pagilian a Pilipinas.
Agtultuloy paylaeng a tagtagikua-en ti Beijing ti kaaduan a paset ti South China Sea, agraman dagiti paset ti West Philippine Sea, iti laksid ti pangngeddeng ti international court nga awan ti legal a batayan dagitoy.
