BAGUIO CITY- Agtultuloy ti tulong a maipapaay kadagiti Overseas Filipino Workers (OFWs) a mapapaawid iti rehiyon nga apektado ti riribok wenno giyera a mapaspasamak sadiay Ukraine.
Iti interview ti Bombo Radyo Baguio kenni Edgar Laigo, Supervising Admin Officer ti Overseas Workers Welfare Administration (OWWA-Cordillera, imbinglayna ti agtultuloy a programa para kadagiti agaw-awid nga OFWs nga apektado ti krisis sadiay Ukraine malaksid kadagiti apektado ti agtultuloy a pandemya.
Sigun kenkuana, 12 itan ti bilang dagiti naipaayan iti assistance nga OFWs manipod Ukraine a pakairamanan ti 6 a tubo ti Benguet; 4 sadiay La Trinidad ken 2 ditoy siudad.
Karaman pay nga pagsaganaanda ti posible a panaggawid dagiti OFWs nga agnanaed sadiay Russia gaputa 403 ti pakabuklan a bilang dagiti umili ti Cordillera a naamoan nga agnanaed sadiay.
Ti kaudian a naipaayan dagitoy iti tulong ti maysa nga Filipino seafarer a tubo ti Cordillera a karaman kadagiti 21 nga seafarer a nastranded sadiay Ukraine gapu iti agtultuloy a panagraut ti Russia iti nasao nga pagilian.
Mainaig iti dayta, dumanonen iti agarup P101-M ti naipaluspos ti Overseas Workers Welfare Administration (OWWA-Cordillera) para iti nagduduma nga programa dagitoy.
Kinuna pay ni Laigo a dumanonen iti nasurok 19,200 nga OFWs a nagawid ditoy pagilian ti natulonganda kabayatan ti pandemya.
Karaman a naipaay kadagitoy ti DOLE-Abot Kamay ang Pagtulong program a pakairamanan ti P10-K nga cash assistance; ti Educational Assistance by Scholarship in Emergencies wenno EASE Programa a panangipaay ti financial assistance kadagiti met dependents dagiti OFWs nga college student.
Agtultuloy met laeng ti programa iti panag-awid dagiti OFWs pakairamanan ti airport assistance agingga a makaawidda kadagiti babbalay dagitoy.
