BAGUIO CITY – Manarimaan ti panangipwesto dagiti kameng ti Baguio Correspondents and Broadcasters Club (BCBC) kadagiti kasapulan nga aramaten para iti mapadpadaanan nga aktibidadda inton Marso 28 idiay Peppot Media Camp, Burnham Park.
Daytoy ket paset ti tinawen a panangipatpatungpal dagitoy iti Search of Baguio Correspondents and Broadcasters Club (BCBC) Lucky Summer Visitor.
Kagiddan dayta, maguyguyugoy iti publiko ken dagiti makaammo iti nasao nga aktibidad manipod siudad ti Baguio ken probinsya ti Benguet a bagaanda dagiti gagayyemda wenno kaam-ammoda a saan a pulos simmarsarungkar kadagiti lugar-pagpasyaran a gundawayanda ti nasao nga aktibidad.
Iti interview ti Bombo Radyo kenni Thomas Antonio Picana, Presidente ti Baguio Correspondents and Broadcasters Club (BCBC), dagiti mapili a turista ket maipaayan ti tallo agingga uppat nga aldaw a free accommodation ken panakaiturong dagitoy kadagiti nagduduma a nalalatak a pagpasyaran iti siudad ti Baguio ken probinsya ti Benguet.
Pakairamanan daytoy ti Stone Kingdom, Wright Park, Strawberry Picking, kasta met a posible a maiturong dagitoy iti Northern Blossom.
Malaksid iti dayta, saan a mapukaw ti panangipasakay kadagiti turista iti kabalyo ken panagbangka-da iti Burnham Lake.
Kabayatanna, kinuna ti opisyal a mangipatungpal dagitoy ti interview kadagiti pasaheros ti Victory Liner iti paset ti Pugo, La Union kas paset ti panagpilida kadagiti makwalipikar.
Manarimaan paylaeng ti panakaipinal dagiti criteria ken manamnama a maiwaragawag daytoy kadagiti sumarsaruno nga aldaw.
Ti nasao nga aktibidad ket maysa a wagas ti panagyaman dagiti maseknan nga indibidwal iti kontribusyon dagiti pimmusayen a kaalyaddo dagitoy iti nasao nga organisasyon kasta met ti panangitandudo iti turismo ti siudad ti Baguio, probinsya ti Benguet kasta met ti Pugo La Union.//Bombo Rob Dominguez
