Maipatungpal ti seminar ken monitoring sadiay strawberry farm partikular kadagiti stalls a mangidiadiaya ti panagkawes dagiti Indigenous Clothes ti La Trinidad Tourism Office ken ti Indigenous People’s Mandatory Representative iti munisipyo ti La Trinidad.
Daytoy ket kasaruno ti viral a post ti maysa a social media influencer a pagaammo a ni Diwata seknan iti panangaramatna iti Indigenous Clothes kas costume.
Iti panakiuman ti Bombo Radyo kenni Richard Wacnisen, ti Indigenous People’s Mandatory Representative, kinunana a mangipatungpalda iti seminar kadagiti amin nga indibidual nga agbanbantay sadiay Strawberry Farm stalls a mangidiadiaya iti panangaramat kadagiti Indigenous clothings.
Inyunay-unayna a rumbeng kuma a mangipaay dagiti agbanbantay sadiay iti umno nga “instructions” kadagiti turista wenno bisita.
Mainaig iti dayta, dinakamat ni Wacnisen a nangipatungpal ti La Trinidad Tourism Office iti monitoring sadiay Strawberry Farm Stalls a mangidiadiaya iti pannakaaramat dagiti ethnic attires, rason a “cautious” metten dagitoy gapu iti napasamak pannakababalaw ni Diwata manipod kadagiti sumagmamano nga Indigenous Peoples.//Bombo Genzel Depayso
