Nangipila ti Senado idi Huebes iti manifestation iti sanguanan ti Korte Suprema a mangkidkiddaw a mailaksid nga agkomento iti petision ni Vice President Sara Duterte a mangkarit iti kaso nga impeachment kontra kenkuana gaputa agserbida a kas impeachment court.
Iti tallo a panid a manifestation, kinuna ti Senado a ti petision ket awan ti alegasion kontra iti Senado.
Kiniddaw pay ti Senado nga aklonenda ti manifestation ad cautelam a kasukat ti kasapulan a komento iti petision ni Duterte kas imbilin ti SC en banc resolution idi napalabas a Pebrero 25.
Ti manifestation ad cautelam ket maysa a deklarasion a naaramid manipod iti “out of caution” kas sungbat iti petision a naipila iti korte.
Maipalagip a nangipila ni Vice President Duterte ti petision idi Pebrero a mangkukuwestunar ti “validity” ken “constitutionality” ti impeachment complaint.
Inrason ni Duterte a rumbeng a maideklara a “null and void” gaputa sinalungasingna ti Constitution’s one-year ban iti panangipila iti adu nga impeachment complaints.
