Kinumpirmar ni Senador Ronald “Bato” dela Rosa nga adda ti blangko nga “item” iti bicameral conference committee report ti 2025 national budget.
Sigun kenni Senador Dela Rosa, dagiti nakipaset iti bicameral ket naipaayan iti kopia ti report iti isu met laeng nga aldaw a napirmaan daytoy, ken nakitana nga adda dagiti blangko.
Dinakamatna a kas pagarigan ti badyet para iti Department of Agriculture, nu sadinno naimatanganna ti blangko nga entry ngem ti pakabuklan a gatad ti ahensia ket adda sadiay.
Kinunana a rumbeng a nasuratan wenni na-fill out ti blangko.
Ni Senador Dela Rosa ket maysa kadagiti nakipaset iti bicameral, ken adda daytoy iti panagpirma iti bicam report, ngem saanna a pinirmaan ti dokumento.
Ti statement ni Senador Dela Rosa ket kapada ti statement ni Senador Imee Marcos nga adda ti blangko nga item iti bicameral report nu sadinno, kontra daytoy iti testimonia dagiti lima a senador a paset ti bicameral.
Maipalagip nga imbutaktak ni sigud a President Rodrigo Duterte ken City 3rd District Representative Isidro Ungab nga adda ti blangko iti bicameral conference committee report ti national budget, ken kinuna ni ni Ungab nga adda dagiti mapukpukaw a budget para iti item iti sidong ti Department of Agriculture ken unprogrammed appropriations.
