Kiniddaw ni Senator Ronald “Bato” dela Rosa ita nga aldaw kenni President Ferdinand Marcos Jr. nga ibilinna ti pannakaikkat dagiti dua ribu (2,000) a kameng ti Pulisya a naidestino iti Kingdom of Jesus Christ (KOJC) compound sadiay Davao para iti arrest warrant kontra ken ni Pastor Apollo Quiboloy.
Idagdagadag pay ni dela Rosa kenni President Marcos Jr. a dumngeg kadagiti arungaing dagiti miembro ti Kingdom of Jesus Christ (KOJC) ken dagiti estudiante ti Jose Maria College Foundation, a naapektaran ti religious freedom ken academic rights gapu iti operasion ti polisia.
Sigun pay kenni dela Rosa, nabannogen ti puso dagiti sumagmamano a miembro ti nasao a grupo, agbabawida iti pinilada a mangidaulo ken napukawanda iti namnama.
Innayon ti nasao nga opisial a mamati iti kapasidad ni President Marcos Jr. a mangaywan iti tunggal Filipino, agsipudta mamati daytoy nga uray iti napolitikaan, kagimongan, relihion, wenno uray iti pisikal ket agkaykaysa ti puso ken espiritu ti tattao.
Nupay kasta, kinuna met ni Senator Risa Hontiveros a no dumngeg dagitoy kadagiti kameng ti KOJC, dumngegda met kuma kadagiti biktima ken survivors iti sexually abused ken dadduma pay a kinaranggas a napasaranda.
Maipalagip a nagturong dagiti kameng ti Philippine National Police (PNP) iti Kingdom of Jesus Christ Compound itay nabiit, tapno iserbida ti arrest warrant kontra kenni Pastor Apollo Quiboloy, no sadino napasamak ti saan a namnama nga ipupusay ti masya a miembro ti nasao a grupo gapu iti heart attack.
