Kinuwestion ni Senator-judge Robin Padilla ti ammo ti witness a ni state auditor Roderick Wamil seknan iti tirurismo ken seknan iti national security kabayatan iti maika-13 nga aldaw ti impeachment trial ni VP Sara.
Iti panagtuloy ti trial, dinamag ni Padilla nu nakadanonen ni Wamil idiay Bangsamoro Autonomous Region in Muslim Mindanao (BARMM), Bicol Region, ken dadduma pay a paset ti Mindanao no sadino makapaspasar dagiti residente iti kinakurang ti taraon ken medisina.
Simmungbat met ni Wamil a nagturongen daytoy kadagiti sumagmamano a lugar ngem saanna a napadasan dagiti dinakamat ti senador. Gapu iti daytoy, kinuna ti senador a saan unay nga exposed ti witness kadagiti dinakamatna a sitwasyon.
Malaksid iti dayta, dinamag pay ti senador ni Wamil nu pamilyar dagitoy iti grupo nga ISIS, Abu Sayyaf, ken New People’s Army (NPA), banag a sinungbatan ti testigo a makitkitana laeng dagitoy kadagiti damag.
Inlawlawag met ni Wamil a saan nga imbestigasyon ti trabaho ti COA iti confidential funds nu di ket ti trabaho da laeng ket tingitingen nu agtungtungpal ti maysa nga ahensya kadagiti pagalagadan iti panangliquidate ken panangireport iti pundo nga inaramatda.
Simmarunno a dinamag ditoy ni Padilla nu pinalen dagiti audit observations nga inparuwar ti COA. INlawlawag ni Wamil a ti Audit Observation Memorandum ket paset laeng ti preliminary stage ti COA audit.
Iti udina, impetteng ti senador ti kinapateg ti confidential funds ken confidential agents iti panangresponder iti pangta ti seguridad iti pagilian.
Simmungbat met ti Wamil no sadino impettengna a ti kasapulan ti maysa nga ahensya iti confidential funds ket nakadepende iti mandato ti tunggal opisina iti gobyerno. //bombokaren.c.sapirao
