Nadismaya dagiti sumagmamano a senador kalpasan ti naipablaak a selfies wenno ladawan dagiti opisyales ti National Bureau of Investigation (NBI) ken Bureau of Immigration (BI) a kaduada ti nakaisem a ni sigud a Bamban, Tarlac Mayor Alice Guo kabayatan ti panakaisublina iti pagilian.
Sigun kenni Senator Risa Hontiveros, kayatda a masungbatan dagiti amin a saludsodda ken saan a photoshoot ti birbirukenda.
Kinuwestionar met ni Senator Joel Villanueva dagiti opisyales nu apay a kayatda a makipicture iti maysa nga indibidual nga ado ti kaso a sangsangoenna.
Kabayatanna, kiniddaw ni Justice Secretary Jesus Crispin Remulla ti panangilawlawag dagiti opisyales iti nasao a pasamak rason a naipaayan dagitoy iti show cause order.
Ngem, kinuna ni Department of Justice Assistant Secretary ken spokesperson Mico Clavano IV, posible a wagas dagitoy ti panangipakitada a nagun-od ti pagilian ti maysa a balligi, ti panakaarestar ni Guo nupay kasta, rumbeng a saan daytoy a naipablaak.
Immuna metten a kinuna ni President Ferdinand Marcos Jr. nga awan ti kamali iti panakiselfie dagiti opisyales kenni Guo nangruna ket paset daytoy ti agdama a kultura.
