Maimbitaran ni sigud a Philippine National Police (PNP) Chief Benjamin Acorda Jr. intun sumaruno a senate hearing para iti imbestigasion iti illegal a Philippine offshore gaming operations (POGO).
Kasaruno daytoy iti pannakaidatag ti sumagmamano a ladawan ni Acorda a kaduana dagiti indibidual nga adda iti pakainaiganda iti illegal a POGO.
Pakairamanan dagitoy ni Tony Yang, ti inauna a kabsatna ken ti sigud a presidential economic adviser ni sigud a president Rodrigo Duterte a ni Michael Yang.
Sigun kenni Tony Yang, dagiti ladawan ket naala bayat ti panagbisitada kenni Acorda idi daytoy paylaeng ti Police chief idiay Cagayan de Oro City ken Regional Police Director iti Region 10 wenno Northern Mindanao.
Inaklon met ni Tony a nabayagda nga agam-ammo kenni Acorda.
Maipalagip a kinuna ni Senior Vice President ti Philippine Amusement and Gaming Corp. a ni Raul Villanueva a sigud a hepe ti Philippine National Police ti timmulong iti panaglibas ni Alice Guo iti pagilian.
Nupay kasta, inadmitirna a sayangguseng laeng ti nasao nga impormasyon.
Kabayatanna, kinuna ni sigud a Philippine National Police (PNP) chief General Benjamin Acorda Jr. nga inaramidna laeng ti pagsayaatan iti pagilian ken ay-ayatenna daytoy kas met ti organisasion ti Philippine National Police.
