Inakusaran ni Senator Risa Hontiveros ti pamilia ti sigud a presidential adviser ni Rodrigo Durterte a ni Michael Yang a karaman dagitoy iti sindikato.
Sigun kenni Senator Hotiveros, nalawag itan a karaman ti negosio ti pamiliada kadagiti dadakkel a crime syndicates a nabayag nga agopoperate iti pagilian.
Maibasar iti imbestigasion, ti kabsat ni Michael Yang a ni Tony ket agtagikua iti Philippine Sanjia Steel Corporation a naipatakder sadiay Cagayan de Oro, nu sadino kagiddan daytoy ti pannakaipatakder ti Philippine Offshore Gaming Operators hubs sadiay Bamban Tarlac ken Porac Pampanga.
Maipalagip a naaraestar ni Tony Yang idi napalabas a lawas sadiay NAIA Terminal babaen kadagiti otoridad iti immigration.
Kinuna met ni Senator Hontiveros a ti pannakaarestar daytoy ket mangibutaktak iti pakainaigan ti pamiliana iti POGO ken Chinese syndicates.
Kabayatanna, naipaulog ti arrest order iti sigud a presidential adviser ni Rodrigo Duterte a ni Michael Yang nga inruar ti House Committee on dangerous drugs kalpasan ti contempt citation gapu iti kaawan na kadagiti hearings mainaig iti P3.6-billion drug buy-bust sadiay Pampanga.
Malaksid iti dayta, adda pay ti pakainaigan ni Micheal iti illegal nga aktibidad ti POGO iti pagilian bayat a ti sabali pay a kabsatda a ni Hongjiang Yang ket maipagarup nga adda iti direkta a transaksionna iti Baofu Land Development, a kompania ni dismissed Bamban Mayor Alice Guo.
