BAGUIO CITY – Imbilin ti Office of the Ombudsman ti panakaikkat iti serbisyo ti sigud nga opisyal ti NCIP-Cordillera ken incumbent Regional Director ti National Commission on Indigenous Peoples (NCIP) Region III a ni Atty. Ronald Calde kalpasan a naduktalan nga adda ti umdas nga ebidensiya a mangpaneknek a guilty daytoy iti grave misconduct.
Daytoy ket maibasar iti sangapulo ket uppat a panid ti desisyon nga insurat ni Graft Investigation and Prosecution Officer III Lauren Gail D. Divino-Sudweste nga inaprobaran ni Ombudsman Samuel Martires.
Malaksid iti panakaikkat ni Atty. Calde iti serbisyo, nawaswas pay ti eligibility daytoy kasta met dagiti benepisyo a mabalinna nga awaten iti panagserbina iti gobyerno ken saan a mabalin nga agtrabaho daytoy iti gobyerno kas maitunos iti Section 10, Rule III ti Administrative Order No. 07 as amended by Administrative Order No. 17 seknan iti Section 25 ti Republic Act (RA) 6770.
Nakalanad pay iti desisyon nga iti kanito nga awanen daytoy iti serbisyo sakbay ti panakaipaulog ti nasao a desisyon ket mamulta daytoy iti gatad a katukad ti makatawen a suweldona a rumbeng a bayadanna iti Office of the Ombudsman, ken mabalin met a maikissay iti retirement benefits ken iti naurnong a leave credits wenno aniaman a mabalinna nga awaten iti opisinana.
Maibasar pay iti desisyon, nakidddaw iti Chairman ti NCIP iti sidong ti Office of the President nga ipatungpalna ti nasao a desisyon apaman a maawatda daytoy.
Nagramut ti nasao a kaso iti dua a nagsina a reklamo nga impila ni Roger D. Sinot kontra kenni Atty Calde idi daytoy pay ti dadaulo ti NCIP-CAR gapu iti maatap a diskriminasyon babaen iti panagkedkedna ken ti nabayag a panangipaayna ti Certificate of Affirmation para kenkuana kas napili nga Indigenous Peoples Mandatory Representative (IPMR) iti siyudad ti Baguio.
Immunan nga impetteng ni Atty Calde a ti nabayag a panangipaay daytoy iti Certificate of Affirmation kenni Sinot Sr., ket gapu kadagiti oposisyon a naawat daytoy manipud kadagiti dadduma a grupo dagiti nainsigudan nga umili.
Ginandat met ti Bombo Radyo Baguio nga alaen ti dasig ni Atty Calde iti nasao a desisyon ngem kinunana a saan pay a mangipaay daytoy iti reaksiyon agsipud ta mangisumitir pay daytoy iti motion for reconsideration.
