BAGUIO CITY – Maad-adal iti konseho ti singasing a pannakaipaay ti dua nga aldaw a menstrual leave tunggal bulan kadagiti babbai nga empleyado iti siyudad ti Baguio City.
Iti panakiuman ti Bombo Radyo kenni John Rhey Mananeng, Presidente ti Sangguniang Kabataan Federation iti Baguio City, nalpasen ti second reading ti nasao a gakat ken manamnama a maaddaan daytoy ti public consultation.
Nailanad iti singasing a tunggal bulan ket dua nga aldaw ti saan a sumrekan iti trabaho dagiti babbai a makapadpadas ti sakit nga adda pakainaiganna iti menstruation period dagitoy.
Iti kanito a mapasamak daytoy, mabayadan latta ti kagudwa nga aldaw dagitoy wenno kagudwa ti sweldoda iti tunggal aldaw ti maipaay kadakuada.
Nupay kasta, nu agsubli dagiti maseknan iti trabahoda ket nasken a mangisumiterda ti medical certificate wenno rekomendasyon manipud kadagiti health experts a mampampaneknek a nakapasar dagitoy ti sakit kas period cramps, dysmenorrhea, ken dadduma pay tapno saan a maabuso ti singasing a linteg.
Kabayatanna, impetteng ni Mananeng a posible a maapektaran dagiti employer iti kanito a maipatungpal ti dua nga aldaw a menstrual leave gapu ta maksayan ti work force dagitoy tunggal bulan.
Innayon ni Mananeng a mabalin metlaeng a ngumato ti bilang dagiti babbai a maawanan ti trabaho.//Rob Dominguez
