BAGUIO CITY – Agtaltalinaed iti Red Alert ti Baguio City iti agdama kagiddan ti panangibayog iti state weather bureau ti probisya iti Benguet iti Tropical Wind Signal Number 1 gapu iti tropical depression Gener.
Iti panakiuman ti Bombo Radyo kenni Engineer Charles Carame, dadaulo iti City Disaster Risk Reduction and Management Office (CDRRMO), dagusda nga inalerto dagiti amin nga emergency operations center idi kalman pakairamanan dagiti babbarangay iti Baguio City nga agsagana dagitoy iti panagrespondeda kadagiti posible a mapasamak nga itunda ti nasao a bagyo.
Malaksid iti dayta, dinakamat ni Carame a nakikoordinardan kadagiti nagduduma a maseknan nga opisina iti siudad.
Nupay naobserbaran a kimmapsot ti nasao a bagyo, impanamnama ti opisyal nga agtultuloy ti panagmonitorda iti kasasaad ti aglawlaw.
Malaksid iti dayta, kinuna ni Carame nga adda dagiti nadutokan a personnel manipod iti opisina dagitoy nga agronda tapno obserbaran dagiti mapaspasmak kagiddan ti agdama a sasaaden ti panawen
Iti sabali a bangir, inlawlawag ni Carame a saan a kaskarina a mangsuspendir iti klase kadagiti pagadalan dagiti local government units (LGU) gapu ta adda ti sursurotenda a pagannurotan iti Department of Education.
Malaksid iti dayta, inlawlawag ti opisyal a saan nga otomatiko a masuspendir ti implementasyon iti Number Coding Ordinance iti Baguio City nu makanselar ti klase dagiti estudyante wenno tunggal adda ti holiday gapu ta masapol ti rekomendasyon manipod it traffic management team nga addaan ti bileg.//Bombo Rob Dominguez
During one of our meetings with the mayor, haan nga automatic nga nu kanselado ti eskwela or even holidays…Haan nga automatic nga kanselado met ti number coding ta ammo tayo met, regardless uray nu awan ti eskwela, holiday man dayta, awan ti effect na, adu latta ti traffic tayo. Isunga it’s all up to the our traffic management team to recommend nu masapol tay met nga ikansela ti number coding scheme.
Engineer Charles Carame | City Disaster Risk Reduction and Management Office- Baguio
