Naarestar ti maysa nga small-scale miner bayat ti naipatungpal a buy-bust operation sadiay Padre Zamora, Baguio City idi January 22,2025.
Ti suspect ket maysa a lalaki, agtawen iti 49 ken residente iti Tangtangadan, Acupan, Baguio City.
Nakumpiskar manipud iti suspect ti maatap a shabu nga addaan iti standard drug price a Php3,400.
Malaksid iti dayta, nakumpiskar ti sabali pay a tallo a piraso ti heat-sealed transparent plastic sachets a maatap a naglaon iti kapada a banag nga aggatad met iti Php 20,400.
Sumagmamano met kadagiti non-drug evidence a nakumpiskar ti maysa a genuine five hundred peso bill, lima a pidaso ti five hundred pesos boodle money, maysa a blue touchscreen cellular phone, ken maysa a green sling bag.
Iti agdama, naipasidongen ti suspect ken dagiti nakumpiskar nga ebidensya iti kustodiya ti City Drug Enforcement Unit.
Balligi ti operasyon babaen iti panagregget ti nagtitipon a pwersa dagiti kameng iti City Drug Enforcement Unit, Baguio City Police Office- Police Station 2, ken ti Criminal Investigation Unit.
Kabayatanna, iti panakiuman ti Bombo Radyo kenni Joseph D. Basinga, kapitan iti Barangay Padre Zamora, imbinglayna nga iti baet a manmano laeng dagiti pannakakemmeg dagiti indibidual iti nasao a lugar, saan latta daytoy maideklara a drug-free barangay.//Bombo Genzel Depayso
