BAGUIO CITY – Pimmusay ti maysa a soldado iti napasamak nga enkuentro iti nagbaetan ti militar ken maatap a Communist Terrorist Group sadiay Barangay Katablangan, Conner, Apayao idi malem kalman.
Sigun kenni Master General Laurence Mina, Commander ti 5th Infantry Division ti Philippine Army, ti pimmusay a soldado ket tubo iti probinsiya ti Kalinga.
Kinunana a saan pay a mabalin a maiwaragawag ti nagan ti nasao a soldado agingga a saan pay a napakaammuan ti pamilyana.
Immuna iti daytoy, nakaawat dagiti autoridad iti impormasyon manipud kadagiti residente sadiay Katablangan nga adda dagiti agrikrikos sadiay nga agarup sangapulo ket uppat a maatap a miyembro ti CTG.
Gapu iti daytoy, dagus nga imbiripikar daytoy dagiti miyembro ti 52nd Division Reconnaissance Company (DRC) ti philippine army a nagresulta iti tallopulo a minutos a rinnupak.
Inyebkas met ni General Mina ti panakipagriknana iti pamilya ti napasag a soldado.
