BAGUIO CITY – Nakumpiskar manipud kadagiti rebelde a New People’s Army (NPA) dagiti high-powered firearms, improvised explosive devices (IEDs), subversive documents ken dadduma a kagawaan dagiti rebelde kalpasan ti napasamak a rinnupak iti nagbaetan dagitoy ken ti tropa ti gobyerno sadiay Mabaca, Balbalan, Kalinga idi kalman, December 12, 2021.
Maibasar iti report ti 5th Infantry Division (5th ID) ti Philippine Army, nagresponde dagiti soldado iti reklamo dagiti umili manipud iti presensia wenno kaadda dagiti NPA iti lugarda.
Naaddaan ti lima a minuto a rinnupak iti nagbaetan dagiti soldado ken dagiti rebelde sakbay a nagsanod wenno immatras dagiti rebelde.
Nadangran bassit ti maysa a soldado iti napasamak nga engkwentro.
Nadiskobre ken nakumpiskar manipud iti nakapasamakan ti engkwentro ti dua nga M16 rifles, maysa nga M653 rifle, maysa a hand grenade, tallo nga IEDs, nagduduma a subersibo a dokumento ken nagduduma a personal a kagawaan dagiti rebelde.
Agtultuloy met ti panagsawar dagiti soldado iti nasao a disso.
Kasaruno iti insidente, imballaag ni MGen. Laurence Mina, Commander ti 5th ID, PA ti panangipasigurado ti gobyerno iti panagbayad dagiti nabatbati a rebelde iti aramidda a terorismo iti sidong ti linteg.
Kinunana a saanda nga ipalubos a rambakan dagiti NPA ti masungad nga anibersaryo ti grupo babaen iti pananggibusda iti insurhensia ken terorismo iti tunggal komunidad.
Innayonna a desperado ita ti NPA ngem saan nga ipaayan ti militar iti gundaway dagitoy a mangisaknap ti buteng kadagiti tattao.
Kagiddan iti daytoy, inyapelana manen ti panagsuko dagiti nabatbati a rebelde tapnu maipaayan dagitoy ti gundaway a makadwa manen dagiti pamilya ken kabagianda nangruna ita a holiday season.
Maipalagip nga indeklara dagiti umili ti Balbalan, Kalinga kas personan non-grata dagiti kameng ti Communist Party of the Philippines-New People’s Army-National Democratic Front of the Philippines.
