Simmungbat ni South African President Cyril Ramaphosa iti pangta ni United States President Donald Trump a mangputed iti tulong gapu iti mapapati a saan a nasayaat a pannakatrato dagiti White farmers.
Iti social media ni Ramaphosa, impaganetgetna a ti South Africa ket maysa nga constitutional democracy a nairamot iti “rule of law,” “justice” ken “equality,” ken saanda a kinumpiskar ti daga.
Segseggaan ti nasao a presidente a makilangen iti administrasion ni Trump tapno mapagtalantanan ti maipapan iti patakaran ti daga ken dagiti isyu a bilateral interest.
Kinuna daytoy ni Ramaphosa kalpasan nga insurat ni Trump iti Truth Social idi Domingo a putdenna amin a masanguanan a pondo iti nasao a pagilian agingga nga adda ti naan-anay nga imbestigasion kadagiti alegasion a ti South Africa ket mangkumpiskar iti daga, ken mangtrato iti sumagmamano a kita ti tattao iti dakes a wagas.
Idi Enero, pinirmaan ni Ramaphosa ti maysa a gakat a nagbalin a linteg a mangikeddeng kadagiti baro a pagannurotan para iti panangagaw iti daga, agraman ti panangipalubos iti gobierno a mangagaw iti daga nga awan ti compensation.
Idi Lunes, inlawlawag ti nasao nga opisial a ti linte ket saan nga instrumento ti panangkumpiskar nu diket maysa a ligal a proseso a mangipasigurado a patas ken nalinteg a wagas ti pananggun-od ti publiko iti daga.
