BAGUIO CITY – Agtaltalinaed a Southwesterly wind flow ti mangap-apektar iti kasasaad ti panawen iti rehiyon Cordillera.
Daytoy ket senyales nga asidegen ti panagsukat ti kasasaad ti panawen manipud iti Easterlies agingga iti Southwest monsoon.
Iti interview ti Bombo Radyo kenni Frankie Cortez, Chief Operations iti Office of Civil Defense – Cordillera, awan ti major effects a naiwanawan dagitoy seknan iti bagyo nga Aghon nu sadino manamnama a rumuar iti Philippine Area of Responsibility (PAR) inton bigat.
Innayona pay a napintas ti epekto daytoy gapu ta mangituntunda iti panagtudo a makatulong met kadagiti mannalon iti panagsaganada para iti farming season.
Iti sabali a bangir, agarup 2% ti epekto ti El Nino phenomenon iti sektor ti agrikultura iti rehiyon wenno dumanon iti nasurok P768-million ti danyos.
Kangrunaan kadagiti nadadael ket dagiti irrigated farms wenno dagiti pagtalonan a mangnamnama iti tudo wenno danum.
Kinunana met a nangipaayen ti Department of Agriculture ken daduma a maseknan nga ahensiya ti tulong kadagiti naapektaran a mannalon iti rehiyon pakairamanan ti ayuda, water pump, buffer seeds, ken daduma pay.
Maipalagip a kangrunaan a naapektaran ti nasao a phenomenon ti probinsiya iti Ifugao, simmaruno ti Kalinga ken Mt. Province.//Bombo Marinel Rodrigo
