BAGUIO CITY – Naipasidong iti state of calamity ti municipyo ti Banaue, Ifugao kalpasan a dinalapos ti napigsa a tudo a nangitunda iti panaglayos ken panagreggaay idi huwebes, Hulyo 7.
Kinumpirmar ni Mayor Joel Bungallon a nangideklara ti state of calamity idi biyarnes ti agsapa tapno mausar ti pundo iti rehabilitasyon ken maaramat iti pagkasapulan dagiti residente a naapektaran iti nasao nga insidente.
Iti inisyal a listaan ti DSWD Field Office Cordillera Administrative Region, dua a balay ti totally damaged bayat a 327 met dagiti partially damaged.
Dumanon iti 500 a pamilya wenno 1,500 nga indibidual manipud iti innem a barangay ti naapektaran iti panaglayos pakairaman ti barangay Amganad, Poblacion, Tam-an, Viewpoint, Poitan ken Bocos.
Kabayatanna, adda met ti tallo a residente a nakapasar iti minor injury ngem dagus a naipaayan dagitoy ti first aid.
Naisubli metten ti suplay ti kuryente iti entero a municipyo, alas singko ti malem idi Biyarnes.
Nupay kasta, parikut ita dagiti umili ti suplay ti danum kalpasan a nadadael ti sumagmamano a tubo ti water system.
Agtultuloy latta met ti clearing operation ti PNP, BFP, AFP ken DSWD nangruna kadagiti kalkalsada gaputa uray nailukat dagitoy ket adda latta dagiti sumagmamano a one lane passable laeng.
