BAGUIO CITY – Posible a sumardengen dagiti sumagmamano a jeepney drivers iti Cordillera nga agpasada nu agtultuloy pay ti panagngato ti presyo dagiti produkto a petrolyo kadagiti sumarsaruno a lawas.
Iti interview ti Bombo Radyo, binigbig met ni Pat Evangelista, dadaulo ti Jeepney Federation iti Cordillera ken Region 1, adda dagiti dadduma nga agbiruk ti sabali a pagbiyagan gaputa kurang ti mapaspastrekkan dagitoy.
Binigbig met ni Evangelista ti naitulong ti kanayonan a plete nga inaprubaran ti Land Transportation Franchising and Regulatory Board (LTFRB) itay nabiit.
Dinakamatna nga idi naipangato ti plete ket adda ti narikna dagiti jeepney drivers nga epekto daytoy gaputa adda ti makaiyaw awid ti P200 agingga P300 a pamastrekkan para iti pamilyada.
Binigbig pay ni Evangelista ti dakkel a tulong dagiti pasahero gaputa adda dagiti gundaway a saandan nga alaen ti barya dagitoy ken adda pay dagiti estudyante ken senior citizen a saanen nga agkiddaw ti diskwento.
Nupay kasta, kidkiddawen manen ti Evangelista ti despensar ken panakaawat ti publiko nu agipilada manen ti kanayonan a plete gaputa awanen ti mabatbati para kadakuada nangruna nu ngumato manen ti presyo ti petrolyo kadagiti sumarsaruno a lawas.
Maipalagip nga adda ti uppat a grupo iti National Capital Region a nangipila ti petisyon a mangkidkiddaw iti peso agingga dos pesos a kanayonan a plete kabayatan ti rush hour partikular iti alas singko ti agsapa agingga alas otso ti agsapa ken alas singko ti malem agingga alas otso ti malem.
Nupay kasta, impetteng ni Evangelista, a saan a karaman ti grupoda a nangipila iti nasao a petisyon gaputa kayatda a sapasap ti panakaipangato ti plete nga awan ti pilpilienna nga oras.
