BAGUIO CITY – Imbutaktak ti Public Order and Safety Division iti lokal a konseho nga adda dagiti personalidad a mangimatmaton ti ado nga stalls iti Baguio City Public Market.
Sigun kenni POSD Deputy Head Daryl Kim Longid, maatap a nagaramat dagiti nasao a personalidad ti dummy account tapno makontrolda ti saan laeng a maymaysa nga stall iti merkado publiko.
Kinunana a dagiti stalls ket ab-abangan dagiti personalidad ken ipapaabangda dagiti daduma iti sabali a vendor iti nangatngato a presio nga adayo iti aktwal a baybayadanda iti lokal a gobierno.
Dinakamatna a panaglabsing daytoy iti probisyon ti Baguio City Market Code wenno ti Tax Ordinance No 2000-01 a mangiparparit iti maysa a vendor a mangimaton ti nasursurok ngem iti maysa nga stall.
Impetteng ni Longid nga umad-ado ti kaso ti subleasing ken daduma pay nga iligal a kita ti panang-ukopar ti ado nga stalls iti merkado publiko gaputa nabayagen a nabaybay-an daytoy nga aramid.
Innayonna nga iti nabayag a panawen ket ginasuten nga stalls ti inukopar ti maysa nga indibidual a nagserbi kas milking cow daytoy no sadino minilyon metten ti napataudna a kwarta.
Impaganetgetna a nasken nga aksionan ti lokal a gobierno ti siudad ti nasao a pakaseknan tapno malapdan ti agtultuloy a panakabiktima dagiti babassit a vendors a napilitan nga agabang ti nangato a rates nga agingga iti 2,000%.
