BAGUIO CITY- Malaksid iti epekto ti pandemya, agsagsagaba itan ti adu a Pilipino gapu iti panagngato ti presyo ti petrolyo ken kangrunaan a gagatangen.
Itay nabiit, inaklon a mismo ti dadaulo ti Department of Labor and Employment ken pannakangiwat ti Malacañang nga adayo a kurang ti minimum a sweldo tapno mabiyag ti maysa a pamilya.
Iti panagadal ti Ibon foundation idi 2021, dumanon iti 1,065 tunggal aldaw wenno 25,091 tunggal bulan ti kasapulan a sweldo ti maysa a pamilya dagiti mangmangged sadiay National Capital Region tapno agbalin a desente ti panagbiyagda.
Ti agdama a minimum wage sadiay NCR ket dumanon iti 500 agingga iti P537 tunggal aldaw.
Ti met minimum a sweldo ditoy Cordillera ket dumanon iti 340 agingga iti 350 pesos tunggal aldaw, wenno 8,160 agingga 8,400 tunggal bulan.
Awan ti nagdumaan ti panagbiyag sadiay NCR iti panagbiyag iti cordillera ken duduma pay a rehiyon iti pagilian.
Pudno nga adu dagiti negosyo a nalugi gapu iti pandemya ngem adda met dagiti negosyo a nagtultuloy a simmaranta kabayatan ti pandemya.
Gapu iti daytoy, panawenen tapno adalen ti gobyerno ti posibilidad a panakaipangato ti sweldo kadagiti mangmangged iti pribado a sektor.
