Nadismaya dagiti mangsupsuporta kenni sigud a president Rodrigo Duterte iti desisyon iti International Criminal Court(ICC)Appeals Chamber a saan a patgan ti interim release daytoy.
Sigun kenni Atty. Manuelito Luna, mangnamnama latta dagitoy a mapatgan ti apelada gapu iti agdama a kasasaad ni Duterte partikular ti salun-atna.
Aminado ti nasao nga abogado a saan a maliklikan nga iruar dagiti daduma ti kaririknada ngem kidkiddawenna kadagiti sumupsuporta iti sigud a presidente nga agkalma dagitoy ken saan a mangaramid kadagiti saan nainsiriban nga aksyon.
Kagiddan dayta, pinabasol ni Atty. Luna ti agdama nga administrasyon iti panangipalubosna a maibalud ni FPRRD idiay The Hague, Netherlands.
Maipalagip nga idi laeng kalman ket inruar iti international tribunal ti panggeddeng daytoy a saan a panangpabor iti kidkiddawen iti kampo ni Duterte nga interim release.
Ti sigud a presidente ket adda ita iti detention facility iti International Criminal Court (ICC) gapu iti kasona a war against humanity mainaig iti kampanya kontra iti iligal a droga ti administrasyonna.
