Imbilin ti Department of Education (DepEd) kadagiti pampubliko a pagadalan a mangisayangkat dagitoy iti tallo a lawas a National Learning Camp (NLC) iti agdama a tawen gapu iti pannakaiyalis ti school calendar idi napalabas nga school year.
Sigun iti Department of Education (DepEd), libre ken boluntaryo daytoy para kadagiti estudyante nga agad-adal kadagiti pampubliko a pagadalan.
Ti nasao a National Learning Camp ket mangrugi inton July 1 agingga inton July 19, iti agdama a tawen.
Panggep daytoy a mapasayaat pay ti performance dagiti estudyante kasta met ti kapasidad dagiti manursuro.
Ti nasao a camp ket kas panagsuportar iti MATATAG Basic Education Agenda kasta met ti sub-program iti sidong iti National Learning Recovery Program (NLRP).
Gapu iti daytoy, guyguyuguyen ti Department of Education (DepEd) dagiti nagannak tapno palubusanda dagiti annakda a makipaset iti daytoy.//Rose
