Pinangtaan ti tallo a pagilian ti Israel gapu iti baro nga opensiba dagiti suldadona idiay Gaza a nangpapanaw ken nangpapatay ti ginasgasut nga indibidual iti napalabas laeng a sumagmamano nga aldaw.
Dagiti tallo a pagilian ket ti United Kingdom, France, ken Canada nu sadinno, kinuna dagiti dadaulo iti nasao a pagilian a mangipaayda ti kongkreto nga addang pakairamanan ti “targeted sanctions” nu saan nga agsardeng ti Israel iti opensibana ken nu agtultuloy ti pananglappedda kadagiti tulong a sumrek iti Gaza.
Itay laeng nabiit, nangiyuswat ti Israel iti baro nga opensibana idiay Gaza.
Sigun kadagiti suldado ti Israel, nagturong ti puersada iti amianan ken abagatan a Gaza idi napalabas nga aldaw kas paset ti “Gideon’s Chariots” operation, nga impakdaar ti Israel a mapasamak no saan nga umanamong ti Hamas iti baro a hostage deal kadagiti kondisionna.
Ti “ground operation” ket napasamak sumagmamano nga aldaw kalpasan ti “airstrikes” idiay Gaza Strip, a sigun kadagiti otoridad, napapatay ti adu a pamilia.
Kabayatanna, kinuna ti Israel a palubosanna ti “basic amount of food” idiay Gaza, maysa a tignay nga impasimudaag ni Prime Minister Benjamin Netanyahu a gapu iti nakaro a panangpilit dagiti kaalyadona, ket kasapulan nga aramidenna.
Nupay kasta, inladawan ni UN aid chief Tom Fletcher a ti panangitulodda ti tulong ket limitado ken saan a kas iti rumbeng a kasapulan dagiti tattao iti nasao a lugar.
