BAGUIO CITY – Nakemmeg ti tallo a wanted persons iti nagduduma nga operasion nga inpatungpal dagiti otoridad sadiay Kalinga ken Ifugao idi Mayo 10.
Umuna a nakemmeg ni Peter Macalo sadiay Liwan East, Rizal, Kalinga babaen iti warrant of arrest nga inserbi ti nagtipon a puersa dagiti otoridad.
Maibilbilang ni Macalo kas No. 4 Top Most Wanted Person (TMWP) iti Provincial level ti Mountain Province ken sumangsango iti kaso a panaglabsing iti Violence Against Women and their Children Act.
Nairekomendar ti panagpiansa daytoy iti P100,000.
Nakemmeg met sadiay Nambaran, Tabuk City, Kalinga ni Arvi Jade Cartagena Tuno a No. 10 Municipal Level Wanted person sadiay Rizal, Cagayan.
Sumangsango daytoy iti kaso a panagtakaw ken nairekomendar ti panagbayanna iti P10,000 a piansa.
Nakemmeg met sadiay Hukbong, Lagawe, Ifugao ni Aljiver Ginaob Dulnuan a No. 5 a Wanted Person iti Regional Level sadiay Region 2.
Nakemmeg daytoy babaen iti warrant of arrest ken sumangsango iti kaso nga statutory rape ken awan ti nairekomendar a piansa para iti daytoy.
Naiturong iti istasion ti pulisya dagiti nakemmeg nga indibidual para iti dokumentasion.
