--Ads--
BAGUIO CITY – Agpatpataming ita dagiti tallo nga indibidual a nadangran kalpasan a natnag iti rangkis ti naglugananda sadiay Bubon, Virac, Itogon, Benguet iti alas-4:15 ita a malem.
Nabigbig ti driver ti nasao a lugan a ni Elvie Fatton Gaab, 41 years old, PNP-NUP ti BCPO Station 4 bayat a dagiti pasahero daytoy ket dagiti dua a menor de edad nga annakna.
Naamuan iti imbistigasyon a natnag iti rangkis ti kotse nga imanmaneho ni Gaab nga addaan kauneg nga agarop 50-metro.
Agdaldalyasat iti kurba a paset ti kalsada ti lugan dagiti biktima idi aksidente a naidungpar iti maysa a loader a nakaparada iti igid ti kalasada agingga a natnag iti rangkis.
Dagus met a naitaray ti pagagasan dagiti biktima babaen kadagiti pulis ken bombero ti Itogon.
