LA TRINIDAD, BENGUET – Nadiskobre ti tallo pulo ket siyam a bomba ken bala sadiay Poblacion, La Trinidad, Benguet itay nabiit.
Iti panakiyuman ti Bombo Radyo kenni Police Staff Sergeant (PSSg) Randy Angday ti Regional Explosive Canine Unit-Cordillera (RECU-CAR), kinunana a manarimaan ti konstruksyon ti maysa a pasdek iti nasao a lugar idi nadlaw backhoe operator a sabali dagiti landok a makalkalina.
Gapu iti daytoy, insardengna ti panag-operatena ti backhoe ken dagus nga inreportna ti insidente iti La Trinidad Municipal Police Station (MPS) agingga a naikoordinar iti Regional Explosive Canine Unit-Cordillera (RECU-CAR).
Dagus met a nagresponde dagiti maseknan nga opisina nu sadino ditoy a naduktalanda dagiti nagduduma a klase ti bomba ken bala nga aglatlatin.
Daytoy ket pakairamanan ti naval round, 30mm round, cartriage cases ken dadduma pay.
Sigun kenni PSSg. Angday, uray aglatlati dagitoy ket delikado ladta gapu ta iti unegna ket “active” dagitoy ken awanan ti expiration date dagiti bomba.
Mapatta-patta a dagitoy ket kagawaan idi panawen ti World War II wenno dagitoy ket maatap nga indulin dagiti beterano.
Nagballaag met dagiti otoridad iti publiko a dagus nga ireport kadagiti maseknan nga opisina nu adda ti maduktalanda bomba wenno war materials.//Wilmea Pacpacan
