Ipangpangruna ita ti Armed Forces of the Philippine(AFP) ti territorial defense ken panangipatungpalda ti modernization program nu sadino, puntiryada a gumatang ti upgraded equipments a makatulong iti tallo a pwersa daytoy pakairamanan ti Philippine Air Force, Philippine Army, ken ti Philippine Navy, kasta metten dagiti Marine Corps.
Iti panakiuman ti Bombo Radyo kenni Commander Anthony R. de Leon, Officer In Charge ti Naval Forces Reserve-North Luzon, dakkel ti diperensya iti pwersa ti China ken Pilipinas ngem kinunana a maysa a nasayaat a mapaspasamak ti panang-amiris dagiti mangidadaulo iti nasao nga ahensya ti panangipangruna iti territorial defense ken panangisakad ti modernisasyon kadagiti napapateg a kagawaan.
Sipapannakkel nga imbinglayna a ti nagatang a Jose Rizal Class frigate ket maysa a multicapable vessel a mabalin a maaramat iti anti-submarine warfare(ASW), anti-air warfare(AAW), ken anti-surface warfare (ASUW) nu sadino, addaanen daytoy ti torpedo, missiles,countermeasures, ken electronic countermeasures.
Malaksid iti panagpatrolya ti nasao a vessel kadagiti territorial waters ti Pilipinas,maaramat metlaeng daytoy para iti panangparegta iti koordinasyon ti Pilipinas kadagiti allies wenno kakadwa daytoy a pwersa.
Iti sabali a bangir, imbinglay ni de Leon a panggep metlaeng ti Philippine Navy a mangala ti submarine a sigun kenkuana ket maysa a napateg nga investment.
Innayonna a nagududman a pagilian ti nangiprisinta kadagiti submarineda nu sadino, ti Scorpene Class submarine manipod France ti makitkitada a maitunos iti parameters a pangibasbasaran ti Philippine Navy.
Nupay kasta, agtultuloy paylaeng ti panangisakadda iti daytoy ken panangidagadagda kadagiti daduma pay a nagangato nga opisyales ti pagilian gapu ta maysa daytoy a dakkel a katulungan iti deterrence ti Pilipinas.
Kabayatanna, inlawlawag ni de Leon nga awanen ti barko a naaramat pay idi World War II nga agingga iti agdama ket ar-aramaten paylaeng ti pwersa dagitoy, malaksid iti BRP Sierra Madre nga agserserbi kas outpost tapno mapagtalinaed ti panangipakita ti Pilipinas nga addaan daytoy ti karbengan iti Spratly Islands.//Bombo Rob Dominguez
