BAGUIO CITY – Naipaulog dagiti kanayonan a temporaryo a restrictions wenno limitasyon kadagiti aktibidad iti siudad ti Baguio kas addang tapnu malapdan ti umad-ado a kaso ti COVID-19.
Imbilin ni Mayor Benjamin Magalong ti total ban wenno naan-anay a panakaiparit ti panagilako ken panangiserbi ti arak ken dadduma nga alcoholic products manipud inton Sabado, September 11 agingga inton September 19, 2021.
Agbalin met a 30% ti maipalubos a customer capacity dagiti enclosed wenno indoor dine-in establishments.
Imbilinna pay ti 20 percent venue capacity para iti religious gatherings, partikular ti worship activities manipud inton Sabado, September 11 agingga inton September 26, 2021.
Inlawlawag ni Mayor Magalong a nakedngan dagiti baro a pagalagadan kalpasan ti panangkonsultana ken panakitaripnongna kadagiti apektado a sektor.
Sigun pay kenkuana, ad-adda a ngumato ti kaso ti COVID-19 iti siudad kadagiti masungad a dua a lawas kas maibasar iti agdama a datus ti nasao a sakit.
Iti agdama, 115 wenno 89.15 percent manipud iti 128 a barangay ti Baguio ti nakailista iti baro a kaso ti COVID-19 iti las-ud ti napalabas a 14 nga aldaw.
