BAGUIO CITY- Ngimmato ti tourist arrival iti siudad ti Baguio idi napalabas a tawen iti baet nga adu ti dimmalapos a bagyo a nangapektar kadagiti pagpasyaran ti siudad.
Iti pannakiuman ti Bombo Radyo kenni Endrew Pinero, pannakangiwat ti Hotel and Restaurant Association of Baguio, kinunana a ‘nakabawi’ ti accomodation sector ti siudad nangruna idi Christmas Holiday.
Maibasar pay iti panagadal a dinakamat ti opisial, ad-adda a paborito a pagpasyaran dagiti indibidual ti siudad ngem ti Boracay nangruna iti maudi a kwarter idi napalabas a tawen.
Sigun kenni Pinero, saan laeng nga accomodation sector ti ngumatngato ti pammastrekanda nu diket kasta metten dagiti restaurant.
Kabayatanna, panggep ti nasao nga opisial nga agbalin a wedding destination, medical destination, agbalin a destinasion para iti pagsayaatan ti panununot wenno relaxation, saan laeng a kas tourist destination, tapno maguyugoy dagiti bisita ken ngumato ti ekonomia iti siudad.
Matalek ni Pinero nga umdas met dagiti pisilidad a naipasdek iti siudad a mangakomodar kadagiti turista nga agturturong iti City of Pines.
