![](https://img.bomboradyo.com/baguio/2020/04/belgium.jpg)
BAGUIO CITY – Ad-adda a dimmagsen ti trabaho dagiti medical frontliners kadagiti ospital a mangtamtaming kadagiti pasyente ti COVID-19 sadiay pagilian a Belgium.
Iti interview ti Bombo Radyo Baguio kenni Bombo International Correspondent Dolrish Aguillon, maysa a geriatric nurse sadiay Antwerp, Belgium, kinunana a ti geriatric ward iti pagtatrabahuanna nga ospital ket napagbalin a full-COVID rehab ward para kadagiti ubbing.
Kinunana a kas maysa a nars dagiti pasyente ti COVID ket ipaspasiguradona met a napigsa ti immune system-na babaen iti pannanganna iti nasayaat ken iti panagtumarna iti bitamina malaksid iti panagaramatna iti protective equipment.
Imbingayna a no makastrekendan iti ayan ti ward a bambantayanda ket saandan a mabalin a rumwar ken maitulod iti ayanda dagiti taraonda ken kalpasan ti duty dagitoy ket masapul nga agshowerda ken ibatida iti ward ti inaramatda nga uniporme ken protective equipment.
Dinakamatna nga iyan-anaydan ti nabatbati a protective equipment dagitoy gaputa bassiten ti suplayda.
Maibasar iti kaudian a datus, nasuroken iti 38,000 ti positibo a kaso ti COVID-19 sadiay Belgium bayat nga agarup iti 8,800 ti nagimbag ken agarup 5,700 dagiti pimmusay no sadino, nangrugi ti lockdown sadiay idi March 18 ken agpaso inton May 3.
Inladawan ni Aguillon nasayaat met ti panagsurot dagiti tattao sadiay Belgium kadagiti paglintegan ti lockdown sadiay kas iti social distancing, panagrikep dagiti non-essential establishments ken dadduma pay.
Inaklonna met a gaputa bumarbaran ti temperatura sadiay ket adda dagiti rumwar nga apan agpaspasyar a nainget met a sitsitaren dagiti pulis.
Imbingayna a 250 Euro wenno katukad ti agarup 13,800 tio multa dagiti masitar nga adda iti ruar ti balay nga awanan ti umno a rason.