Napagnunumwan dagiti opisyales ken daduma pay nga stakeholders nga ipatungpal ti lima nga aldaw a panangpadas iti two-way traffic scheme sadiay Pines Park Bridge Balili La Trinidad, Benguet.
Iti panakiuman ti Bombo Radyo kenni Billy Bilango, kapitan ti nasao a barangay, impakaammona a mangrugi daytoy inton May 27 agingga May 31 tapno makitada ti pagbanagan ti nasao a traffic scheme.
Kasaruno paylaeng dayta ti naangay a taripnong wenno consultation nu sadino, dinakamat ni Bilango a daduma kadagiti dimmar-ay ket nangisingasing iti makabulan a panakaipadas ti two-way traffic scheme iti nasao a rangtay ngem kamaudiananna, ti naisingasing metlaeng a lima nga aldaw ti napagnunumwan.
Sigun iti kapitan, adda dagiti traffic enforcer a mang-asistar kadagiti motorista bayat ti panakaipatungpal ti nasao nga addang, kasta met nga adda manamnama a partisipasyon dagiti barangay tanod iti nasao a lugar kasta metten dagiti maseknan nga opisyales manipod adjoining wenno kabangibang daytoy a barangay.
Iti agdama, one-way traffic scheme paylaeng ti epektibo iti nasao a rangtay nu sadino, dagiti laeng sumrek a motorista ti mabalin a dumalan iti daytoy.
Kabayatanna, positibo met Bilango a saanen masagid pay dagiti motorista dagiti sumagmamano a wire a nakaiwayat iti masakupan ti rangtay gapu ta nangaton dagitoy kasta met a saanen masagid pay dagiti dadakkel a lugan a dumalan iti rangtay dagiti naimuntar nga streetlights.
Ti Pines Park Bridge ket addaan ti maximum capacity a 30,000 Tons.//Bombo Rob Dominguez
