Nairaman dagiti tallo nga unibersidad iti Cordillera partikular ti siyudad ti Baguio ken probinsiya ti Benguet kadagiti top 100 universities iti pagilian.
Maibasar iti resulta nga inruar ti EduRank itay nabiit, maysa nga independent metric-based ranking website, Top No. 28 ti University of the Philippines (UP) – Baguio, Top No. 41 ti Benguet State University idiay La Trinidad, Benguet ken Top No. 83 ti Saint Louis University iti Baguio City.
Rank No.1 ti University of the Philippines (UP) – Diliman bayat a Rank No. 2 met ti De La Salle University.
Ti resulta ket naibasar iti research outputs, non-academic prominence, ken alumni influence.
Nadetermina ti ranking babaen ti panang-analisa ti 500-K a citations manipud iti 58.8-K nga academic publications dagiti 229 universities iti pagilian.
Nu maipapan met iti best universities iti entero nga Asya, Rank No. 2,460 ti University of the Philippines (UP) – Baguio, Rank No. 2,727 ti Benguet State University ken Rank No. 3,587 ti Saint Louis University.
