![](https://img.bomboradyo.com/baguio/2020/06/marijuana-samoki-1.jpg)
BAGUIO CITY – Sumangsango iti nagtutuon a kaso dagiti tallo a drug couriers kalpasan a nagpositibo ti drug test dagitoy kasaruno ti panakakemmegda gapu iti panangibiaheda iti minilyon a gatad ti marijuana bricks iti interdiction operation nga insayangkat dagiti otoridad sadiay Finew, Samoki, Bontoc, Mountain Province idi Sabado, June 20 ken iti panaglabsingda iti Bayanihan to Heal as One Act.
Immunan a nabigbig dagitoy a da Noli Navalez, Wilfredo Magbanua Jr. ken Mary Grace Lunas a bin-ig a residente ti DasmariƱas, Cavite.
Sigun iti PDEA-Mountain Province, nakalugan dagiti tallo iti maysa a sedan a nagtaud sadiay Bontoc, Mountain Province ken paawid sadiay Cavite babaen iti Bontoc-Banaue Road.
Pinara dagiti otoridad ti nasao a lugan ken iti inspeksion ket sadiay a nadiskobre ken kinumpiskarda ti 53 a pidaso ti marijuana bricks nga aggatad ti P6.36-M.
Naamuan a naka-imet dagiti tallo iti Authority to Travel, Medical Certificates ken Quarantine Passes no sadino, inrason ti nakemmeg a ni Mary Grace Lunas a returning worker daytoy sadiay Bontoc, Mt. Province ken itulod laeng daytoy dagiti dua a kadwana isut gapuna a nakalsutda kadagiti quarantine checkpoints manipud Cavite angingga Mountain Province.
Naduktalan pay iti imbestigasyon a nagtaud dagiti nakumpiskar a marijuana bricks sadiay Kalinga ken sinabat laeng daytoy dagiti tallo sadiay Bontoc, Mountain Province.
Naipasidong dagiti tallo iti drug test ken nagpositiboda iti resulta bayat a maur-uray ti resulta ti swab test dagitoy para iti COVID-19.
Iti agdama, nakabalud dagiti tallo iti istasyon ti pulisya sadiay Bontoc, Mountain Province.