BAGUIO CITY – Agpapaimbagen dagiti pito a pasahero a nadangran kalpasan a naidungpar ti naglugananda a parapasahero jeep iti poste ti kuryente sadiay Magsaysay Avenue, Baguio City idi malem kalman.
Ti jeep ket addaan ruta a Baguio-Bahong ken addaan plaka nga AYN 663.
Nabigbig ti driver a ni Alfredo Singyao Pagat, 62-anyos ken residente ti Upper Wangal, La Trinidad, Benguet.
Sigun iti pulisya, nagapo ti jeep iti sentro ti siudad ken paturong sadiay La Trinidad idi nadungparna ti poste ti kuryente iti igid ti kalsada.
Naduktalan iti imbestigasion a napukawan iti preno ti lugan isut gapuna a napilitan ti driver a mangidungpar iti daytoy iti poste.
Gapu iti daytoy, natumba ti poste a naiballangan iti entero a kalsada a nagresulta iti panakairikep daytoy agingga idi rabii.
Dagus met a naiturong iti pagagasan dagiti biktima para iti panakataming dagitoy.
