BAGUIO CITY – Nabigbigen ti bangkay ti lalaki a nasarakan iti baba ti rangkis iti igid ti kalsada sadiay Kennon Road, Camp 3, Tuba, Benguet idi kanikadua.
Binigbig daytoy ni PMaj. Dominador De Guzman, hepe ti Tuba Municipal Police Station a ni Christian Del Prado Alvar alyas Sadeek, tubo ti Sta. Barbara, Pangasinan ken residente ti Camp 7, Kennon Road, Baguio City.
Maipalagip a ni Alvar ket lider ti Sadeek Drug Group nga addaan operasyon iti Cordillera Region ken Region 1, partikular iti Baguio City, Benguet, La Union ken Pangasinan malaksid pay a sumangsango daytoy iti nagtutuon a kaso mainaig iti iligal a droga, murder, carnapping ken dadduma pay.
Nakemmeg ni Alvar a maysa a high value target idi Agosto 2019 kalpasan nga inserbi dagiti otoridad ti warrant of arrest daytoy gapu iti kaso a panaglabsingna iti Comprehensive Dangerous Drugs Act of 2002.
Maipalagip pay a nakipinnaltog ni Alvar ken ti kadwana kadagiti pulis a mangisaysayangkat ti checkpoint sadiay Asin Road, Baguio City idi Abril 2019 no sadino, nakumpiskar iti inabandonada nga SUV ti sumagmamano nga iligal a droga.
Kinuna ni PMaj. De Guzman a nasarakan ti bangkay ni Alvar iti baba ti rangkis nga addaan kauneg a 30 metro.
Kinunana a narunoten ti ulo ni Alvar malaksid pay nga agruprupsan ti bagi daytoy.
Inala metten ti pamilya ni Alvar ti bangkayna para iti cremation.
