BAGUIO CITY – Dumanonen iti nasurok 400 a baboy ti napapatay iti agarup tallo a lugar iti Benguet kas paset ti addang ti lokal a gobyerno tapnu malapdan ti panagwaras ti African Swine Fever (ASF) virus iti masakupan ti probinsia.
Sigun kenni Benguet Provincial Veterinarian Dr. Merriam Tiongan, impasidong ti ASF Task Force iti culling ti 192 a baboy iti masakupan ti one-kilometer radius ti ASF ground zero sadiay Obulan, Beckel, La Trinidad.
Naisayangkat ti culling kalpasan a nagpositibo iti ASF virus dagiti blood samples a naala kadagiti baboy iti maysa a backyard piggery sadiay a nagresulta iti panaka-apektar ti pagbiagan ti 31 a pamilya iti agarup siyam a sitio iti Barangay Beckel.
Pinapatay pay ti ASF Task Force ti agarup 35 a baboy sadiay Camp 1, Tuba kalpasan a nagpositibo metlaeng iti ASF virus ti blood samples dagiti nasao a baboy.
Innayon ni Dr. Tiongan a boluntaryo met nga impasidong ti maysa nga agtartaraken iti baboy sadiay Camp 6, Tuba iti culling dagiti 177 a tarakenna a baboy kalpasan a nakitaan dagitoy iti sintomas ti ASF.
Sigun pay kenkuana, inyemplementardan ti ‘1-7-10 Protocol’ tapnu malapdan ti panagwaras ti ASF virus babaen iti panakapapatay dagiti baboy iti apektado a lugar ken iti panakaipawil ti panakaiserrek ken panakairuar dagiti baboy kadagiti apektado a lugar.
