--Ads--
BAGUIO CITY – Nabigbigen ti maikapat a bangkay a nasarakan iti baba ti rangkis iti nagbeddengan ti San Pascual, Tuba, Benguet ken Tubao, La Union idi February 13 ti agdama a tawen.
Sigun kenni PMajor Dominador De Guzman, dadaulo ti Tuba Municipal Police Station, adda ti pamilya a nangbigbig iti nasao a bangkay.
Nupay kasta, kinunana a saanda pay nga iwaragawag ti nagan ti nasao a bangkay gaputa nasken a maisayangkat nga umuna ti beripikasyon.
Maipalagip a nasarakan ti kaudian a bangkay iti baba ti rangkis iti igid ti kalsada nga addaan kauneg a 15 metro.
Naamuan pay a nabungon iti masking tape ti ulo ti bangkay ken adda ti sugat iti barukong daytoy.
Maipalagip pay a daytoyen ti maikapat a bangkay a nasarakan sadiay Tuba, Benguet ita a tawen.
