Freddie RullodaBAGUIO CITY – Addan ti persons of interest ti pulisya iti napasamak a robbery a nakabiktimaan ti maysa a taxi driver ditoy siudad ti Baguio.
Imbinglay daytoy ni P/Major Darwin Zacharias Zafra, commander ti Baguio City Police Office – Camdas Police Station 2 iti panakiuman ti Bombo Radyo Baguio.
Sigun kenkuana, agtultuloy ti imbestigasyonda iti kaso ken adda ti ur-urayenda a video footage manipud iti taxi a nagluganan dagiti suspek manipud iti nakapasamakan ti krimen.
Naamuan a nagpatulod dagiti suspek pasubli sadiay Lower Magsaysay nga immunan a nangparaanda iti taxi ti biktima.
Dinakamat ni Major Zafra a nakikoordinardan kadagiti maseknan nga establishimento ken kadagiti opisyal ti Barangay P. Burgos tapnu makaalada ti video footage dagiti CCTV cameras a naimuntar iti masakupan ti barangay nangruna iti nakapasamakan ti krimen.
Imbinglayna pay a dagiti persons of interest dagitoy iti kaso ket addaanen ti sigud a kaskaso kas iti robbery.
Mainaig iti daytoy, naamuan a nakaruaren iti ospital ti biktima a taxi driver ken impasigurado daytoy ti kinasaganana a makitinnulong iti pulisya para iti naparpartak a panakabigbig dagiti suspek.
Maipalagip a maysa a babai ken dua a lallaki ti suspek.
Mainaig iti daytoy, ibalbalakad ni Major Zafra ti panagannad ken panagridam dagiti taxi drivers kontra kadagiti hold-uppers.
Kinunana a nasken nga ammuen dagiti taxi drivers ti modus dagitoy.
Dinakamatna a no mapasaran dagiti taxi drivers ti kapada a modus a napasamak iti biktima a taxi driver ket nasaysayaat no iturongda laengen dagiti pasaheroda iti kaasitgan nga istasyon ti pulisya.
Impasiguradona met nga agtultuloy ti panagpatrolya dagiti pulis iti masakupan dagitoy a babbarangay nangruna iti rabii.
Inyapelana met ti dagus a panangipaka-ammo dagiti taxi drivers iti sitwasyon dagitoy iti pulisya wenno kadagiti kakadwada babaen iti two-way radio dagitoy.
Innayonna nga adda met ti seminar nga isaysayangkat dagiti pulis para kadagiti taxi drivers ken operators tapnu masurwan dagitoy iti panagbalinda a natalged bayat ti panagbiaheda.
Sigun pay kenni Major Zafra, agtultuloy ti panagrikosda kadagiti business establishments iti masakupanda tapnu allukuyen dagiti agtagikua kadagitoy nga aginmuntar ti CCTV cameras gaputa dakkel a tulong dagiti nasao a gadgets iti imbestigasyon no adda dagiti mapasamak a krimen.
Impasiguradona met nga agimbestigarda kalpasan nga imbinglay ti lider ti maysa a grupo ti taxi drivers nga adda manen dagiti mailugluganda a nabartek ken naabak iti sugal.
Innayonna nga im-imbestigaran pay dagitoy dagiti maatap nga operasyon ti iligal a sugal iti lokalidad.
Nupay kasta, inyunay-unay ni Major Zafra nga iti masakupanda ket nainget ti panangipatungpalda ti curfew hours kadagiti pasdek, pakairamanan dagiti inoman.
Immunan nga imbinglay dagiti taxi drivers a maysa a rason iti panag-hold-up dagiti pasahero kadagiti taxi drivers ket ti kaawan ti kwarta dagiti pasahero gapu iti panaka-abakda iti sugal.
