BAGUIO CITY – Nangisayangkat iti ritual ti lokal a gobyerno ti Tinoc, Ifugao sadiay Kabayan, Benguet sakbay nga inyawidda ti bangkay ti konsehal ti munisipyo a pimmusay iti aksidente iti deppaar ti Mangkew, Pacso, Kabayan, Benguet idi Sabado, September 5.
Iti interview ti Bombo Radyo Baguio kenni Tinoc Mayor Samson Benito, kinunana a naiyawid laeng sadiay Tinoc ti bangkay daydi Councilor Mercury Binwihan kalpasan ti panagpartida ti baboy a paset ti nainsigudan a kaugalian iti rehion.
Pinagyamananna met ti lokal a gobyerno ti Kabayan, Benguet gapu iti tulong ken panangasikaso daytoy kadagiti biktima iti aksidente, partikular iti retrieval operation agingga iti panakaiyawid ti bangkay konsehal sadiay Tinoc.
Innayonna met a gapu iti agdama a pandemya ket tallo laeng nga aldaw a malamayan ti bangkay daydi Councilor Binwihan ken masurot dagiti health protocols kabayatan ti lamay.
Maipalagip a nagtaud sadiay La Trinidad, Benguet ti lugan a pick-up nga inmaneho ti konsehal ken nagluganan ti lima a pasaherona ken paturongda sadiay Sitio Mangkew, Barangay Pacso, Kabayan, Benguet tapnu dumar-ay iti lamay ti maysa a kabagianda.
Nupay kasta, kabayatan ti panagdalyasatda iti pasalog a paset ti kalsada ket saan a nasiputan ti konsehal ti kurba a paset ti kalsada a rason iti panakatnag ti lugan iti rangkis nga addaan kauneg a mapattapatta a 50 a metro.
Dagus a naitaray dagiti biktima iti pagagasan ngem naideklara a dead on arrival ni Councilor Binwihan.
Nakaro met a nadadael ti pick-up.
