BAGUIO CITY – Agtultuloy ti panagsagana ti munsipyo ti La Trinidad para iti maangay a Bagong Pilipinas Serbisyo Fair Caravan inton bigat, April 21 agingga inton Lunes, April 22 kadagiti uppat a sites pakairamanan ti La Trinidad Municipal Gymnasium, Sports Complex sadiay Wangal, Benguet State University, ken Codillera Career Development College (CCDC).
Iti panakiuman ti Bombo Radyo kenni Mayor Romeo Salda, manamnama ti panakipaset dagiti sumagmamano a nangangato nga opisyales ti pagilian pakairamanan ni House Speaker Martin Romualdez, ken limapulo ket pito (57) a Congressman.
Sigun kenni Mayor Salda, maangay inton bigat dagiti highlights ti aktibidad partikular sadiay Benguet State University nu sadino maipaay ti nagduduma a serbisyo manipod kadagiti nagduduma a line agencies.
Malaksid kadagiti serbisyo, manamnama met a maipaay ti liwliwa babaen iti maangay a konsierto dagiti sumagmamano a nalalatak a singer kasta met ti fireworks display.
Kabayatanna, dinakamat ti mayor a nangipatungpal ti inspeksyon dagiti national security forces tapno masiguro a nasayaat dagiti venue.
Manamnama met a maaramid ti dry run ita nga aldaw nangruna iti panang-escort kadagiti sangaili.//Bombo Rob Dominguez
