BAGUIO CITY – Pinadayawan ti Police Regional Office Cordillera dagiti uppat a nagretiro nga aso kabayatan ti “Salamat Kapatid and Kaibigan Program” iti Masigasig Grandstand, Camp Major Bado Danwa idi Nobyembre 17.
Indauloan ni Col. Patrick Joseph Allan, PROCOR Deputy Regional Director ti seremonya, nu sadinno naipaayan ti certificates ken pammadayaw pakairamanan ti dog treats dagiti uppat nga aso nga agnagan ti NORA, VILMA, JACKSON ken JOKO
Nagserbi ni VILMA ti walo a tawen bayat a pito a tawen kenni NORA, agpada a Belgian Malinois ken agpada a nagserbi iti Explosive and Detection iti PNP.
Nagserbi dagiti aso kas contingent bayat ti panagbisita ni Pope Francis iti pagilian idi 2015 ken naideployda iti Cordillera para iti election, festivals ken regular a maidepdeploy iti Baguio Night market.
Ni JACKSON, maysa a Belgian Malinois ket nagserbi iti PNP iti uneg ti innem a tawen kas search and rescue dog ken katulongan a nakabirok iti mapukpukaw a Korean National sadiay Mountain Province idi 2016.
Timmulong pay iti panakabirok dagiti tallo a casualty iti landslide kabayatan ti bagyo nga Ompong idi 2018 ken naibaon pay tapno birokenna ti bangkay ti maysa a baket a naireport a mapukpukaw sadiay Bokod, Benguet iti isu metlang a tawen.
Kabayatanna, ti Belgian Malinois a ni JOKO, ket nagserbi iti PNP iti uneg ti innem a tawen kas Narcotic Detection Dog (NDD).
Ti aso a ni JOKO ket timmulong iti panakabirok ti P2.4 million ti gatadna a marijuana ken panakakemmeg dagiti dua nga indibidual sadiay Tublay, Benguet idi 2020.
Timmulong ni JOKO iti panakakumpiskar ti P2.3 million a gatadna a marijuana sadiay Kibungan, Benguet, ken iti daduma pay a paset ti Benguet.
Naited ti Medalya ng Kasanayan kadagiti handler dagiti uppat nga aso.
