BAGUIO CITY – Manayonan dagiti agserbi a vaccination sites ditoy siudad ti Baguio tapnu adda mangakomodar iti umad-ado a bilang dagiti kayatna ti agpabakuna kontra iti COVID-19.
Imbilin ni Mayor Benjamin Magalong ti panangpapartak dagiti maseknan nga opisina iti panakailukat ti dua a satellite vaccination sites iti University of Cordilleras Grade School an Junior High School iti deppaar ti Hamada Subdivision Road ken iti Rillera Building iti Baguio City Public Market.
Sigun kenni City Health Officer Dr. Rowena Galpo, dua kadagiti baro a disso ti aglukat iti aniaman nga aldaw ita a lawas kalpasan a makompleto amin a logistical ken documentary requirements.
Maakomodar iti pasdek ti UC dagiti residente dagiti kabangibang daytoy a barangay bayat a maakomodar iti Rillera Building dagiti market vendors, komboy ken dadduma nga umili.
Masurot met iti pasdek ti UC ti ‘drop-and-go flow’ gapu iti kinakurang ti pagparadaan.
Iti agdama, lima ti vaccination mega sites ti siudad ken dagitoy ket masarakan iti Saint Louis University parking building, University of Baguio gym, Saint Louis School Inc. sadiay Sainy Vincent, SM City Baguio ken iti Baguio Country Club.
Makinegnegosasyon metten ti lokal a gobyerno ti Baguio kadagiti dadduma nga institusyon kas iti Pines City Doctors Hospital ken iti Philippine Economic Zone Authority para iti panagbalin dagitoy a vaccination sites.
